Félagið eignaðist nýja æfinga loftskammbyssu af gerðinni Hammerli AP-20 fyrir skemmstu.

Byssan hentar sérstaklega vel yngstu iðkendunum, eða frá 15 ára aldri þar sem þetta er loftbyssa. 
Byssan er með stillanlegu skepti í stærðum frá S til L og er hægt að breyta því þannig að það henti fyrir vinstri eða hægri hendi.
Loftkúturinn er nettur og er hægt að láta hann snúa lóðrétt eða lágrétt. Með því að hafa hann lóðrétt er léttara að halda byssunni fyir yngri iðkendur.

Skotíþróttafélagið Skyttur er að skoða aðstöðu í samvinnu við Rangárþing-eystra á Hvolsvelli fyrir loftgreinar. Verður þá hægt að halda æfingar í loftskammbyssu og loftriffillgreinum ásamt mögulega sömu greinum með laser. Hentar það einstaklega vel með ungmennastarfi þar sem þessar greinar eru hentugar fyrir ungmennagreinar. Félagið hefur til umráða nokkrar skotgildrur fyrir pappírsskífur og 4 rafeinda skotgildrur sem eru ætlaðar fyrir loftgreinar.

Voru tveir vinnudagar haldnir um og eftir páska þar sem uppsláttur fyrir fyrsta skref í riffillhúsi var kláraður og steypa pöntuð. Mætti hópur galvaskra félagasmanna báða dagana. Einnig voru leirdúfuvélar teknar niður til að gera klárt fyrir nýju vélarnar á skeet vellinum.

Næsta skref er að halda áfram að slá upp fyrir sökkli og taka leirdúfuhúsin í gegn, mála og þrífa ásamt því að yfirfara völlinn allan

Spennandi tímar framundan

Skipt verður um kóða á talnalás að hliði og félagshúsi 15. apríl næstkomandi. Þeir sem hafa greitt árgjöld fyrir 2022 fá sendan nýjan talnakóða í tölvupósti.

Tvær æfingar/kynningar hafa verið haldnar í ungmennastarfi og var áhugi og aðsókn langt umfram væntingar. Á þriðja tug barna og ungmenna mættu og æfðu á laser æfingabyssur og loftbyssur.  Fekk félagið lánaðar byssur frá Skotíþróttafélagi Kópavogs til þess að koma þessi af stað.

Á landsmóti í 50m liggjandi riffli sem haldið var í dag af Skotíþróttafélagi Kópavogs bætti Óðinn Magnússon eigið Íslandsmet í flokki drengja. Skaut hann 526,5 stig. Setti hann fyrra metið fyrir 3 vikum og skaut þá 501,2 stig svo um töluverða bætingu er að ræða.

Þann 12. mars var haldið Landsmót loftgreina í Digranesi.

Í loftskammbyssu karlaflokki var efstur Magnús Ragnarsson úr Skyttum með 528 stig, annar var Jón Árni Þórisson úr Skotfélagi Reykjavíkur með 495 stig og þriðji var Guðni Sigurbjarnason úr Skotíþróttafélagi Kópavogs með 472 stig.

Í loftskammbyssu drengjaflokki var efstur Óðinn Magnússon úr Skyttum með 475 stig og annar var Sigurgeir Máni Heiðarsson úr Skotfélagi Keflavíkur með 346 stig.

Í loftskammbyssu stúlknaflokki var efst Sóley Þórðardóttir frá Skotfélagi Akureyrar með 522 stig.

UPPFÆRT 15.03.2022

Var gert við veginn og er hann núna vel fær. Færum við Áhaldahúsi Rangárþings eystra bestu þakkir fyrir stuðning og sá Valur Gauti um að laga veginn.

Við skoðun í dag kom í ljós að vegurinn hefur skemmst við ræsi vegna vatnavaxta.

Verður reynt að laga þetta við fyrsta tækifæri.

Óðinn Magnússon keppti í unglingaflokki drengja í 50m liggjandi riffli á landsmóti í dag fyrir hönd félagsins. Óðinn er fyrsti keppandinn í þessum flokki í greininni og setti þar af leiðandi Íslandsmet. Hann er nýbyrjaður að æfa þessa grein og skaut 501,2 stig. Við óskum honum til hamingju með árangurinn.

Kynning á ungmennastarfi sem fór fram á Laugalandi fimmtudaginn 24. febrúar gekk mjög vel og um 20 krakkar mættu ásamt foreldrum sínum. Voru krakkarnig mjög áhugasöm en ekki síður foreldrarnir. Fengu krakkar 15 ára og eldri að skjóta úr loftbyssum, bæði loftriffli og loftskammbyssu og þau yngri fengu að nota rafútgáfuna af sömu byssum. Vakti þetta mikla lukku og þótti erfitt að hætta. Voru þarna mjög efnilegir krakkar á ferð.